Fáfræði móðir ofstækis - ICESAVE

Stríð er friður. Frelsi er ánauð. Fáfræði er máttur. Orð Orwells í bókinni 1984, sem út kom fyrir 60 árum, lýstu andstæðum í fáránlegu þjóðfélagi framtíðar.

Nú er fáránleg framtíð hér. Við sem vorum börn fyrir 60 árum, lifum fáránleika þar sem svart er hvítt – og hvítt er svart og fáfræði máttur stjórnmálamanna.

Stjórnlagaþingi almennings er sópað frá með stjórnvaldsúrskurði ósnertanlegs Hæstaréttar, því stjórnmálamenn og Hæstiréttur vilja semja eigin leikreglur. Það þætti skrítið í fótbolta.

Samningurinn um Icesave – um skuldir afbrotamanna, er talinn samkomulag heiðursmanna sem almenningur á greiða án þess að skilja upp né niður, enda veit enginn rétt né rangt, heldur ekki lögfræðingar, og hver höndin er uppi á móti annarri.

Fáfræðin er því ekki aðeins máttur. Fáfræðin er móðir ofstækis og ranglætis. Það verðum við börn fortíðarinnar að sætta okkur við.