Framboð til stjórnlagaþings

Ég hef ákveðið að bjóða mig fram til stjórnlagaþings. Ástæðan er sú, að ég vil leggja mitt af mörkum til að móta nýja stjórnarskrá sem tryggi lýðræðisleg mannréttindi, félagslegt öryggi, jafnrétti á öllum sviðum og frelsi til orða og athafna.

Ný stjórnarskrá skal treysta undirstöður lýðræðis, sem er mannvirðing og umburðarlyndi, og tryggja skýra þrískiptingu valds, eignarhald þjóðarinnar á auðlindum, landsréttindi og umhverfisrétt sem móta samskipti fólks við umhverfi sitt.

Ný stjórnarskrá skal reist á traustri siðvitund og stuðla að virðingu fyrir sögu Íslands og hefðum íslenskrar tungu, rituð á vönduðu máli og vera stuttorð og gagnorð svo allir skilji.

Athugasemdir

[Árni Gunnarsson, 15.10.2010 kl. 15:56]

Og ég mun hvergi spara mig við að styðja þig í því verkefni.

[Tryggvi Gíslason, 15.10.2010 kl. 18:07]

Þakka þér fyrir, Árni. Gott er að eiga góða að.

[Ben.Ax. (Benedikt Jóhannes Axelsson), 15.10.2010 kl. 19:24]

Ekki mun sparnaður minn verða minni en hjá Árna.

[Tryggvi Gíslason, 15.10.2010 kl. 19:32]

Ég endurtek: gott að eiga góða að, Benedikt!

[Jón Baldur Lorange, 19.10.2010 kl. 20:04]

Það mun auka líkur á farsælli niðurstöðu stjórnlagaþings að hafa þig þar sem fulltrúa. Gangi þér vel. 

[Þorgeir Ragnarsson, 20.10.2010 kl. 09:58]

Nú þyrstir mig að vita hvað þú átt við með þjóðareign á auðlindum; auðplindir eru mjög margs konar. Hvaða auðlindir eru þeir að tala um sem vilja gera slíka breytingu?

Tiltekinn skilningur á þessu atriði gæti þýtt afnám eignarréttar á einhverjum sviðum þjóðlífsins. Þið sem flaggið þessu þurfið að segja skýrt hvað þið eruð að tala um, án undanbragða.

[Tryggvi Gíslason, 20.10.2010 kl. 13:15]

Þakka þér fyrir að spyrja, Þorgeir Ragnarsson. Ég skal ég reyna að svara þér skýrt og skorinort.

Þegar ég tala um "eignarhald þjóðarinnar á náttúruauðlindum" á ég við allar auðlindir lands og sjávar - mér liggur við að segja einnig lofts og lagar, bæði þær náttúruauðlindir sem nú eru kunnar og hinar sem eiga eftir að koma í ljós. Arður af þessum auðlindum á að renna óskiptur í ríkissjóð, sjóð allra landsmanna, og úr honum get aðeins Alþingi veitt, þ.e.a.s. kjörnir fulltrúar þjóðarinnar.

Helst vildi ég ekki slá neinn varnagla til þess að flækja ekki málið. En ef einstaklingur á sögulegan og lögvarinn rétt á náttúruauðlind og eignarhald hans skaðar ekki almannaheill, verður að virða þann eignarrétt eins og annan persónulegan lögvarin eignarrétt.