Stjórnmál er barátta um hagsmuni og völd

Stjórnmál er barátta um hagsmuni og völd. Þannig hefur það verið og þannig verður það. Gamli Karl Marx hafði rétt fyrir sér. Stéttabaráttan heldur áfram í nýjum myndum og stétt manna ræðst af menntun, stöðu, hagsmunum og völdum.

En miklu skiptir, hvernig þessi barátta er háð. Á Íslandi hafa átökin oft verið hörð, þó ekki harðari en á öðrum Norðurlöndum. Hins vegar eru aðferðirnar, sem beitt er, og hugsunin, sem að baki býr, mjög ólík því sem er annars staðar á Norðurlöndum.

Við Íslendingar erum harðskeyttir, duttlungafullir og óvægnir, eins og íslensk náttúra, og tillitslausir - við höggvum menn sem standa vel við höggi. En einkum erum við agalaus þjóð. Það kemur fram fram í baráttunni og umræðunni um stöðu, hagsmuni og völd .

Gríski heimspekingurinn Epíkúros sagði um 300 árum f. Kr., að ef menn vildu njóta ánægju í lífinu, skyldu þeir ekki skipta sér af stjórnmálum en njóta lífsins með yfirvegum. Þessi kenning á ekki upp á pallborðið hjá okkur sem enn lifum Sturlungaöld.

Athugasemdir

[Ben.Ax. (Benedikt Jóhannes Axelsson), 4.2.2011 kl. 15:49]

Í mínu ungdæmi kynntist ég baráttu stjórnmálamanna sem vildu bæta hag þeirra sem minnst máttu sín í þjóðfélaginu. Til þess að árangur næðist þurftu þeir völd. Ef saman fara völd og góðvild farnast okkur vel. Sem betur fer hefur þeirri stjórn, sem nú situr, tekist að snúa við því tafli sem var að leiða okkur til glötunar. Eigum við því ekki að fagna því að stjórnmál snúist um hagsmuni (okkar) og völd (stjórnmálamanna)?

Sendi til gamans af þessu tilefni vísu sem var ort á kennaraþingi vegna umræðna um samvinnu sem talið var að þyrfti að vera rétt og helst lóðrétt ef árangur ætti að nást.

Harður er kjarni vors kennarablóðs
ef kraftana stillum til samans.
Sé samvinnan lóðrétt hún leiðir til góðs
en sú lárétta er meira til gamans.

[Tryggvi Gíslason, 4.2.2011 kl. 17:55]

Góð athugasemd, Benedikt Jóhannes, og skemmtileg vísa.