Danshneykslið "Dans, dans, dans"

Ótrúlegt var að verða vitni að úrslitum í danskeppni Ríkissjónvarpsins í kvöld. Stúlkan, sem bar af öðrum og dansaði klassískan ballett eins og engill, komst ekki áfram, en óagaður samkvæmisdans og morgunleikfimi fjögurra mæðra komst áfram. Hér er einhver maðkur í mysunni, s.s. skipulögð símakosning vina og vandamanna. Hugmyndin með dagskrá RÚV var góð - en framkvæmdin er algert hneyksli.

Athugasemdir

[Ben.Ax. (Benedikt Jóhannes Axelsson), 13.11.2011 kl. 10:11]

Gallinn við keppni af þessu tagi (Eurovision einnig) er að fólk kýs vini sína og ættingja í flestum tilfellum. Það kýs sjaldnast það sem því finnst best. Reikna má með að fjögurra manna hópur fái fjórum sinnum fleiri atkvæði en einstaklingur. Þetta er víst einn angi lýðræðisins. Stundum kemur þetta okkur illa, sbr. þegar Silvía Nótt var send sem fulltrúi þjóðarinnar í sönglagakeppnina, en oftast angrar þetta okkur aðeins um stundarsakir en gleymist svo eins og flest sem sagt er og gert í nafni lýðræðisins.

[Tryggvi Gíslason, 13.11.2011 kl. 10:16]

Hárrétt, Benedikt. Þetta er dæmi um að vilja ná til lýðsins, gefa honum brauð og leiki - en á ekkert skylt við lýðræði í stjórnskipunarlegu samhengi.

[Guðmundur Paul, 13.11.2011 kl. 10:48]

Ég verð að segja að ég er þér hjartanlega sammála.

Þar sem ég er mikill aðdáandi danssýninga og keppna varð ég fyrir miklum vonbrigðum með þáttinn. Einnig finnst mér trúðslæti Gunnars skemma fyrir. Stúlkan sem dansaði ballettinn bar af öllum öðrum.

[Tryggvi Gíslason, 13.11.2011 kl. 10:53]

Satt segir þú, Luktar-Gvendur, en kímnigáfa Íslendinga hefur lengi komið fram í fíflalátum og heimskuhlátri. Því meira sem menn hlægja, því fyndnari finnst þeim þeir vera.

[Vendetta, 13.11.2011 kl. 12:37]

Sammála. Fyrir utan símakosningar, sem eru ekkert lýðræðislegar, en sem hafa þær afleiðingar að það lélegasta vinnur keppnina, þá er rót vandans líka, að allt of margar leikfimisæfingar (sum nýtízku dansatriði, aerobics, hip-hop, breakdance o.fl.) eru ekki dansar í raun og veru en fá samt að taka þátt í danskeppni. Og þetta var líka vandamál þarna eins og Tryggvi bendir á. Það grefur undan því sem á ensku heitir integrity (ekki til neitt gott orð yfir það á íslenzku) og er óréttlátt gagnvart þeim þátttakendum sem hafa æft alvöru dans árum saman.

Þetta var líka vandamál, að mínu áliti, í þættinum So You Think You Can Dance?, en amk. voru þar ekki haldnar símakosningar um hverjir kæmust til Las Vegas, heldur panel af dómendum með vit á dansi. Og þar var yfirleitt dæmt stranglega, en sanngjarnt út frá gæðum dansins og hæfileikum dansaranna. En því miður fengu sumir aðilar  með ekkidans-atriði líka að taka þátt. 

[Tryggvi Gíslason, 13.11.2011 kl. 17:00]

Bjóst við miklu þegar ég sá kynninguna og heyrði að Ragnhildur Steinunn, sú frábæra útvarps- og sjónvarpskona, stæði að baki þessu. Nú er sú von brostin. Þetta er - og verður klúður.

[Billi bilaði, 14.11.2011 kl. 13:45]

Nutuð þið dansanna minna út af úrslitunum?