Skítlegt eðli og æðruleysisbænin

Gamall bekkjarbróðir lenti í slysi fyrir nokkrum árum – raunar eins og íslenska þjóðin. Hann lamaðist fyrir neðan háls og er bundinn hjólastól. Það sem bjargaði honum við þetta áfall að eigin sögn, var æðruleysibænin: „Guð gefi mér æðruleysi til að sætta mig það, sem ég fæ ekki breytt, kjark til að breyta því, sem ég get breytt, og vit til að greina þar á milli.”

Stundum finnst mér eins og eina hjálp okkar í þessu kalda landi sé æðruleysisbæn. Íslenskir stjórnmálamenn eru lamaðir fyrir ofan háls og geta því ekki hugsað heila hugsun og lamaðir fyrir neðan háls og geta því ekki farið um landið og áttað sig á aðstæðum og litið á samfélagið sem eina heild.

Sagt er að mannskepnan sjái það sem hún vill sjá, heyri það sem hún vill heyra og skilji það sem hún vill skilja. Þetta er endurómur af orðum mannsins frá Nasaret þegar lærisveinar hans spurðu, hvers vegna hann talaði til manna í dæmisögum og hann sagði: Sjáandi sjá þeir ekki og heyrandi heyra þeir ekki né skilja. Sumir sjá svo aðeins hið skítlega í eðli.

En sem betur fer sjá ýmsir hið góða, og þótt alþingismenn séu margir ekki þingtækir og flestir stjórnmálamenn duglausir, er margt gott að gerast í þessu fámenna þjóðfélagi á hjara veraldar. Gott starf er unnið í skólum landsins, allt frá leikskólum til háskóla og listamenn sýna hæfileika á fjölmörgum sviðum: leikarar, dansarar, söngvarar, hljómlistarmenn, málarar, myndlistamenn, rithöfundar, skáld - og hönnuðir.

Ef til vill væri hins vegar rétt að auka við æðruleysisbænina og hafa hana þannig: Guð gefi mér æðruleysi til að sætta mig það, sem ég fæ ekki breytt, kjark til að breyta því, sem ég get breytt, og vit til að greina þar á milli – og sýn að koma auga á það sem gott er gert. 

Athugasemdir

[Óskar Sigurðsson, 22.3.2012 kl. 23:47]

Gott Tryggvi.

[Anna Sigríður Guðmundsdóttir, 23.3.2012 kl. 10:24]

Takk fyrir góðan pistil Tryggvi. Það finnst aðeins einn Guð, og hann er í okkar eigin sálarljósi og huga og alheimsljósorkunni. Því miður voru misvitrir, sjúkir og gráðugir menn, sem afskræmdu og pólitíkus-flokkuðu þetta ljós.

Þessir heims-valda-sjúklingar kalla sannleiks-ljósis trúar-brögð, til að drottna og dæma samborgarana og náungana. Þetta er Guðlastið mikla. Þetta er siðleysið sem heimsbyggðin er að glíma við núna.

Engum árangri verður víst náð, án þess að staðsetja sig nákvæmlega þar sem maður raunverulega er, og biðja sjálfan sig um að hafa þá auðmýkt sem til þarf, til að leysa verkefnin, og ná árangri til góðs fyrir alla, eða deyja annars.

Ekki má gleyma að þakka fyrir allt það sem maður er svo heppinn að hafa. Þessu gleymum við víst mörg allt of oft á Íslandi.

Við lifum til að gera vitleysur og læra af þeim. Það má ekki þagga niður þá staðreynd, eins og sumir reyna, með hegningar-svipuna á lofti! Hver er öðrum svo miklu æðri af mannlegum og gölluðum persónum, að geta með réttu tekið sér svona drottnunar-vald yfir samborgurum sínum?

Í mínum huga er það herlaust land, sem er mikilvægast af öllu, og er ómetanlegt, og verður aldrei metið til fjár. Hernaður er gerður út af vondum öflum, sem tortíma öllu góðu sem þau koma nálægt, og siðlaus græðgi er sama fársjúka tortímandi sortin. Heimsbanka-hernaður er ekki skárri en skotbardagar á vígvelli. Við eigum að sameinast um að segja nei við þátttöku í slíkum banka-hernaði, sem stjórnað er af svikulum samböndum og bandalögum, sem sigla undir fölsku friðarflaggi.

M.b.kv.