Biskupssetur eða byggðasafn

Tollheimtuskáli einveldisins 

Þrír staðir á Íslandi eru helgastir: Þingvöllur, Skálholt og Hólar. Allt í einu er risið í Skálholti tilgátuhús, Þorláksbúð, sem var tollheimtuskáli danska einveldisins þegar svo hart var gengið fram í skattheimtu að Biskupstungur voru nefndar Sultartungur.

Tollheimtuskáli danska einveldisins skyggir á stílhreina kirkju Harðar Bjarnasonar húsameistara sem vígð var 1956 og reist á grunni kirkjunnar „er að réttu kallast andleg móðir allra annarra vígðra húsa á Íslandi,“ eins og segir í Hungurvöku, sögu fyrstu biskupanna í Skálholti. Tollheimtuskálinn fordjarfar ásýnd staðarins og minnir á fátækt og umkomuleysi þjóðarinnar.

Nú vilja aðilar í ferðaþjónustu taka höndum saman um „uppbyggingu menningartengdrar ferðaþjónustu” í Skálholti með því að endurreisa þar miðaldadómkirkjun og reka sem „sjálfbært menningar- og sýningarhús” og hefur verkefnið verið kynnt kirkjuráði. Af myndinni hér að dæma kemur „miðaldadómkirkjan” til að yfirskyggja staðinn.

Er stefnt að því að gera einn helgasta stað Íslands að byggðasafni?

Athugasemdir

[Hrólfur Þ Hraundal, 13.5.2012 kl. 12:05]

Skondið. Eftir því sem skýrast má skilja, þá eru bara tveir möguleikar í boði varðandi Skálholt. 

Annar er að hreinsa allt gamalt rusl frá menningar lausum steinkumbalda, sem reistur var til dýrðar þeim sem teiknaði hann en ekki þjóðinni sem borgaði.

Hinn möguleikinn er ekki í boði.            

[Eyjólfur Jónsson, 13.5.2012 kl. 20:36]

Hrólfur! þegar þú talar hristast múrar Jeriko. þorláksbúð er Perlan hans Árna J. eftir að hinar perlurnar fóru á hausinn og á vergang. Einhverju verða þeir að snúast í, ekki eru þeir að framkvæma neitt á þingi þingmennirnir. En satt er að þetta er ekki gæfulegur staður, þetta er eins og skipulagsmálin í Kópavogi, allt í þvælu..