Ekki er öll vitleysan eins

Seðlabankastjóri sagði frá því á ársfundi Seðlabankans í mars, að bankinn undirbyggi útgáfu nýs peningaseðils. Ákvæðisverð seðilsins yrði tíu þúsund krónur. Mun þá átt við verðgildi hans. Ástæðan er verðlagsþróun og aukið seðlamagn í umferð – eða með öðrum orðum veðbólga og sukk samfélagsins. Útlit seðilsins verður svipað og fyrri seðla, en myndefni tengt Jónasi Hallgrímssyni. Skartar seðillinn einnig lóunni, að því er seðlabankastjóri sagði.

Fróðlegt væri að vita hver fengið hefur þessa furðulegu hugmynd að skreyta seðilinn myndefni tengt Jónasi Hallgrímssyni. Hvers á Jónas Hallgrímsson að gjalda? Hann var einn fyrsti menntaði náttúrufræðingur Íslendinga og fyrsta íslenska nútímaskáld þjóðarinnar, listaskáldið góða og ástmögur þjóðarinnar? Líf hans og starf tengdist ekki peningum – heldur öðrum verðmætum, eins og þeir vita sem eitthvað vita um Jónas.

Hvernig heilvita mönnum kemur til hugar að tengja myndefni á stærsta peningaseðli lýðveldisins Jónasi Hallgrímssyni – og lóunni, er óskiljanlegt. Jónas Hallgrímsson var fátækur vísindamaður og skáld og hafi ef einhver fugl verið fuglinn hans var það þrösturinn: „Þröstur minn góður, það er stúlkan mín.”

Fyrir hönd Jónasar Hallgrímssonar er hér með krafist lögbanns á útgáfu tíu þúsund króna peningaseðils Seðlabankans.

 

Myndin hér að ofan er teikning séra Helga Sigurðssonar af Jónasi Hallgrímssyni 

gerð með hjálp myndvarpa, lucida camera, í maí 1845, þ.e. eins konar ljósmynd

 

Athugasemdir

[Kristinn Pétursson, 12.8.2012 kl. 10:39]

Það er búið að sverta minningu Jóns forseta 6 sinnum með því að úrelda peningaseðla með mynd af honum - og síðasti fimmhundruðkallinn hlýtur að vera á leið í klink.

Það er ekki einu sinni auðvelt fyrir hugmyndaríkustu menn  hvaða myndi á að setja á þetta.

Líklega er best að skipta í  Bandaríkjadal eða Kanadadollar.  Skiptimynt hefur elítið  með sjálfstæði að gera - nema til að fella gengið og hafa verðbólgu og skaða af öllu saman  fyrir alla þjóðina.

Evra kemur ekki til greina í þessu ástandi  enda vill ESB ekki leyfa okkur að nota Evru  nema þeir fái  auðlindir okkar gratís sem kemur  varla til greina.   

[Gylfi Gylfason, 12.8.2012 kl. 14:27]

Mér er málið skylt þar sem ég sel íslenska peningaseðla og mynt um allan heim og hef auðvitað gaman af einhverju nýju í vörulínuna mína.

Í fyrsta lagi hefði ég viljað umræðu um þetta mál en láta ekki seðlabankann ákveða þetta í einhverju egóflippi. Þeir gerðu líka þau reginmistök að fyrirframvelja hönnuð í stað þess að hafa hönnunarkeppni sem hefði skilað miklu frjórri og betri vinnu en einhver sérvalinn teiknari, seðlabankanum hugsanlega tengdur.

í öðru lagi hefði seðlabankinn átt að spyrja sig hvað Jónas hefði vilja láta kenna sig við, hefði honum fundist þessi minnisvarð sér sambærilegur eða viðeigandi?

í þriðja lagi þá skil ég ekki hvað lóan á að gera á seðlinum en hugsanlega er það ákvörðun eiginkonu seðlabankastjórans eða eitthvað viðlika, eða kannski var þetta ákveðið undir glasi á árshátíð bankans. Hví ekki fálkann eða örninn t.d.?

Persónulega finnst mér að seðlana skuli prýða athafnamenn sem kunnu að afla fjár, einhverjir sem við þekkjum. Setjum Helga í Góa á tíuþúsundkallinn :)